Fimm hlutir á fimmtudegi.

 

Ég var að skreyta eldhúsið mitt með þessari ljómandi fínu fánalengju sem ég keypti í Tiger. Ég virðist með öllu ófær um að kaupa gardínur - það er á hreinu. Ég bind því vonir mínar við að þessi lengja skýli mér þegar ég slysast inn í þetta bölvaða eldhús ber að ofan á morgnana. Það hefur nú bara komið fyrir einu sinni. Mesta lagi tvisvar.

 

 

Fánalengjan er heilir 10 metrar. Nóg í afgang til þess að skýla fleiri gluggum fyrir nekt minni. Nei, allt í lagi. Ég er aldrei nakin. Ég bý í Breiðholti. En fánalengjan er hinsvegar sniðugt skraut fyrir hvers kyns samkvæmi. Kostar ekki nema 300 krónur. Kjarakaup. 

 

 

Ó, það var gert vel við sig í Breiðholtinu í kvöld. 

Já. Ég bý í Breiðholti. Ég er með hárlengingar. Ég elska fiskbúðing. Til að kóróna þetta allt saman þá á ég pantaðan tíma í ljós á morgun. Í ljós. Ég hef ekki farið í ljós síðan um fermingu. Ég er bara svo fjári lasleg og föl þessa dagana. Ekki get ég borið á mig brúnkukrem án þess að þurfa að setja sjálfa mig í félagslega einangrun í marga daga. Þannig að já, í ljós ég ætla. Bara einn tíma. Einn. Þið dæmið mig ekki fyrir það. 

 

 

 

Máltíð eins og á fimm stjörnu veitingahúsi. 

Það var meira að segja afgangur. Afgangs fiskbúðing nota ég í dýrinds samloku daginn eftir. Það er sko heldur betur ljúfmeti. Ég skal sýna ykkur á morgun. 

 

 

Megastore í Smáralind. Þá sjaldan sem ég villist þangað inn.  

 

 

Sokkapar, Hershey´s súkkulaðibúðingur og varasalvi sem bragðast eins og franskar kartöflur. Fyrir rúmlega 800 krónur. Ég læt það nú eiga sig.

 

 

Glöggir Ikeaaðdáendur hafa kannski veitt því athygli að nú er kominn sósubar á veitingastaðinn. Þetta kann ég vel að meta. Ég er nú þegar búin að snæða þarna tvisvar það sem af er þessari viku. Búin að marínera mig nokkuð vel með gráðaostasósu. Jú og kjötbollusultunni. Hún er á barnum líka. 

 

 

 

 

Þetta súkkulaði bara verðið þið að smakka. Dökkt súkkulaði með lakkrísbragði. Það fæst í Hagkaup. Ég myndi jafnvel taka þetta súkkulaði fram yfir baðferð með Simon Cowell. Svona jafnvel.

Það er einhver bingókúlukeimur af þessu. Örlítill. Almáttugur, ég þarf að fara í tilraunastarfsemi með þetta um helgina. Bræða það yfir ís. Yfir mig. Dýfa í hnetusmjör. Setja það í hafragraut. Ó, svo margir möguleikar.

Jæja.

Heyrumst. 

Guðdómlega klístraðar Twixsmákökur.

 

Það var svo ferlega vont veður í gær. Hvað gera bændur þá? Baka. Ó, þeir baka.

 

 

 

Þessar eru svakalegar. Mín hefðbundna mánudagsmegrun var eyðilögð á núll einni. Ekki hófst þessi ágæti þriðjudagur betur. Það hafa þónokkrar kökur fallið í valinn það sem af er morgni. 

 

Twixsmákökur.

1 og 1/2 bolli af mjúku ósöltuðu smjöri

3/4 bolli púðursykur

1/4 bolli sykur

1 stórt egg

2 teskeiðar vanilludropar

2 bollar af hveiti

2 teskeiðar Maizenamjöl 

1 teskeið matarsódi

Fáein korn af salti

1 og 1/2 bolli saxað Twix

3/4 bolli dökkir súkkulaðidropar

 

 

 

Byrjum á því að hræra saman smjörið, púðursykurinn, sykurinn, eggið og vanilludropana. Þetta er hrært í góðar fimm mínútur - þangað til mixtúran er létt og ljós.

 

 

 

Já. Ég á Kitchen Aid vél. Höldum því til haga. 

 

Nei, ég var ekki að gifta mig í laumi. Amma mín heitin átti hana og afi minn heitinn gaf mér hana eftir hennar dag. Mín dýrmætasta eign fyrir utan afkvæmið. 

 

 

 

Þegar eggja- og sykurblandan er vel hrærð og fín bætum við restinni af hráefnunum saman við. Fyrir utan Twixið og súkkulaðið. Sú dýrð fer síðast ofan í skálina.

 

 

 

 

 

 

 

Hrærum súkkulaðið varlega saman við. Síðan þarf deigið að hvíla í ísskáp í góða tvo tíma eða svo. Ömurlegir tveir tímar það. Ég hefði ekki einu sinni lagt í þessa uppskrift ef ég hefði lesið hana til enda áður en ég hófst handa. Ég las bara Twix og var ósjálfrátt komin með bölvaða hrærivélina upp á borð.

 

 

 

 

 

Jæja. Tveimur erfiðum tímum síðar.

 

Feita barnið sem ég var yfirgefur mig auðvitað aldrei. Þess vegna bætti ég aukabitum af Twixi ofan á kökurnar áður en þær fóru inn í ofninn. 

 

Kökurnar fara inn í heitan ofn á 175° og dúsa þar í sirka átta mínútur. Það þarf svo að leyfa þeim að kólna vel eftir að þær koma út.

 

 

 

 

 

 

 

Ég legg ekki meira á ykkur. 

 

Bakið þessar.

 

Heyrumst.